Sunday, May 29, 2011

सात गद्य कवितावां

धीरज
आपां सगळां जाणां- जूंण रो ’ऐंड’ पण तो ई खथावळ नीं करां, जीवां जूण नै जूण री गत । जाणां- छेकड़ में कीं नीं बचैला, सिवाय ओळूं-बिरछ रै ; का फेर बचैला कीं सबद जिका सूं कोई कवि बणावैला- ओळूं-बिरछ ।

म्हैं परखणो नीं चावूं- आप रो धीरज, क्यूं कै म्हैं आगूंच जाणूं- आप रो धीरज है आप मांय ; बिंयां आप सगळी बातां सगळा भेद एक चुटकी में ठाह करणा चावो पण कविता री तीजी ओळी उतावळ ठीक कोनी ।

माफ करजो, आ कविता जूण दांईं फगत दो ओळी री है, जिण मांय सूं एक ओळी म्हैं मांड दीवी अर दूजी ओळी आप नै मिल जावैला ; म्हैं आगूंच कैयो नीं- धीरज है आप मांय । बा ओळी अचेत पड़ी है आपां री ओळूं मांय इण पैली ओळी रै विजोग मांय ।
***

प्रेम
म्हैं करूंला प्रेम, पण प्रगट नीं करूंला । जाणूं कोई नीं रोक सकै प्रेम नै बो जठै-जद चावै प्रगट होवै, प्रगट होवण री सगळी सगती हुवै प्रेम मांय अर बा सगती जे म्हैं लुको सकूं तो सफळ होवैला म्हारो प्रेम ।

म्हैं नीं बता सकूं प्रेम री इकाई, सो म्हैं प्रगट नीं करूंला- म्हारो प्रेम ।
म्हैं कर लियो प्रेम अटकता-भटकता, संकता-संकता क्यूं कै म्हैं नीं चावतो हो प्रेम अर म्हैं आगूंच कर चुक्यो हो प्रेम ।

किणी प्रेम रै माप सूं ई करी जा सकै परख प्रेम री, पण म्हैं नीं चावूं । मोलावणो-तोलावणो हुयां प्रेम री जान निकळ जावै । सो इण नांव बिहूणै प्रेम नै लुको सकूंला तद ई सफळ होवैला प्रेम ।
***

नाटक
आ जूण एक नाटक है, पण म्हैं कलाकार कोनी । फेर इण रंगमंच माथै कांईं हूं म्हैं ? माडाणी मुळकणो, हंसणो अर नकली रोवणो म्हारै बस री बात कोनी । कूड़ सूं चिड़ है म्हनै, घणैमान सूं अरज है कै म्हनै फगत म्हारै हाल मांय मस्त रैवण दो ।

आलोचक बंधु ! सिरजक भाईजी सूं करजो अरज कै कथा मांय गैर-जरूरी किरदार जूण रो स्वाद बिगाड़ै । म्हैं कैवूंला आपां रै सिरजक नै थांरै बारै मांय कै चांकैसर राखै अक्कल थांरी क्यूं कै थानै दाळ में पैल-पोत कांकरो जोवण री कुबाण पड़गी है । जे कदैई कदास थांनै नीं लाधै कांकरो, तो कैवो- पूरी सीझी कोनी दाळ । थे काढो ऐब माथै ऐब- कदैई मिरच-मसालै री कमी नै लेय’र कूको । माफ करजो ! म्हारो कैवणो बस इत्तो ई’ज है कै थे खुद रो स्वाद सगळा माथै मती थोप्या करो ।

म्हैं पलटू म्हारी बात- जद आपां सगळा हां रंगमंच माथै, तो हा सगळा ई पक्का कलाकार, भलाई खुद नै माना का ना माना । आ रचना है एक कविता रै भेख अर म्हैं आपनै किणी रै कैयां सूं नीं, खुद कैय रैयो हूं- कै जद आ जूण है एक नाटक तो आपां बचां खुद रै नाटक सूं ।
***

इंदर-धनुस
इंदर-धनुस जोयां नै बरसां रा बरस बीतग्या । अकाळ अर बिखै री गंगरत टाळ म्हारा कवि, बाकी कीं दाय ई कोनी करै- कविता लिखण खातर । एम. एससी. पास म्हारो मास्टर भायलो कैवै- धूड़ है भणाई-लिखाई नै, आ कांईं काम ई कोनी आवै ।

इंदर-धनुस रै सात रंगां मांय किसो रंग कठै किसी कूंट भरीजैला- गैरो का फीको ? आ तो म्हैं जाणूं ई कोनी । फेर कविता मांय सजावट रै समचै बिना सोच्या-समझ्यां क्यूं आ बिसादी बात टोर दी ! जूण रा रंग भासा सूं होवै अर बा आपां पाखती कोनी,
सो रंग ई कोनी आपां रा कवियां पाखती । आपां बिखै अर काळ री मार माथै मार खावता कविता नै उणी मारग टोर दी- बस सतसई बणावण री हथोटी झाल लीवी । म्हैं म्हारै छोरै नै दे दीवी खुल्ली छूट- बणा थारी मरजी रा फोटूड़ा अर भर उणा मांय दाय आवै जिको रंग... थारी मरजी मुजब ।

इनदर-धनख पेटै छेहली बात, म्हारो छोरो कैवै- ओ म्हारो हाथी हरो है । म्हैं बरजू कोनी । काळो अर धोळो ई नीं लाल-हरो-नीलो अर पीळो भी हो सकै है हाथी, पण बो बेगो ई जाण लेवैला आप री भूल । म्हैं कैवूं म्हारै छोरै नै कै थूं भारत रो झंडो तिरंगो बणावणो सीख लै, अर जिकी भासा थारै रगत रळियोड़ी है उण मांय केसरिया रंग का काळो-धोळो-हरो रंग ना लमूटै । राखजै सावचेती !
***

मूंढै पाटी
म्हैं म्हारै दुख बाबत कीं कैवूं किंयां ? छत्तीस बरसां सूं म्हैं म्हारै मूंढै तो पाटी बांध्योड़ी है । इत्ता बरसां पछै ई म्हांरी गूंगी जात नै थे ओळख नीं सूंपी ।

म्हैं लिखी जिकी बातां, थे बांची कोनी । म्हैं जिको कीं कैवूंला, बो सीधो-सीधो थे समझ नीं सकोला ; क्यूं कै थे म्हारी भासा जाणो ई कोनी अर जाणो ई हो..... तो मानो कोनी, थां नीं मानण री आगूंच धार राखी है । सुणो ! थे नीं मार सको म्हारी भासा नै । बां म्हांरै लोही मांय है अर थे कद तांई पीवोला लोही ?

कवि का इण समाज रै अंस रूप म्हैं करूंला कीं तो जतन । कवि रूप म्हैं म्हारी सांस भेळै गूंथ ली म्हारी भासा, एक सामाजिक इकाई रूप कैवूं आ ओळी एक- आंख मींच कितरा दिन करोला अंधारो ।

म्हारी सांस रै हरेक आंटै मांय अमूझै है भासा । भाईजी ! मूंढै पाटी कोई मा रै पेट सूं कोनी लायो ।
***    

ऊंठ
ओ ऊंठ दांईं सूतो ई रैसी कांई?” जीसा रा बोल उठतां ई उण रै कनां पड्‌या। स्यात्‌ बो खासी ताळ भळै ई सूतो रैवतो, पण अबै बो आंख्यां मसळतो उठग्यो हो। पण जागता थकां ई बो तुरत पाछो नींद में भळै जाय पूग्यो, जठै बीं नै सपनो याद आयो हो।    
         
बो सपनै में देख्यो हो कै बो सचाणी ई ऊंठ बणग्यो है। पण अबखाई आ ही कै बो ऊंठ बण्यां उपरांत ई सोचै हो कै बो कांईं करै। अठी-उठी हांडता-हांडता ई उण नै कोई मारग कोनी लाध्यो, च्यारूंमेर रिंधरोही ही अर उण रै किणी सवाल रो जबाब बठै कठै लाधतो। बिंयां बो घोर अचरज में ई हो कै बो बैठो बैठायो इंयां ऊंठ किंयां बणग्यो। घर अर मा-जीसा री याद ई उण नै आई पण बो जाणै बेबस हो। उठर दो च्यार गडका काढ्यां ई उण नै निरांयत नीं बापरी तो आभै कानीं नाड़ ऊंची करर ठाह करण री कोसीस करी कै नाड़ कित्ती लांबी है। ओ भणाई रो असर हो कै बो नाड़ तुरत ही हेठै कर ली। उण नै भाई रा बोल चेतै आया कै ऊंठ री नसड़ी लांबी हुवै तो कांई बा बाढण तांई हुवै है।
           
जीसा कैवै हा- चमगूंगा, इंयां चमक्योड़ै ऊंठ दांई अठी-उठी कांईं देखै। उठ, देख कित्तो सूरज माथै आयग्यो।" उण नै चेतै आयो कै रात सूवण सूं पैली ई जीसा उण नै झिडकता थकां कैयो हो कै "लड़धा, ऊंठ जित्तो हुयग्यो। अबै कीं काम-धंधो कर्‌या कर।"
***

चालो माजी कोटगेट
बड़ी गवाड़ बीकानेर माथै एक तांगैवाळो हो जिको हरेक चलतै नै बकारतो- चालो माजी कोटगेट।बो काल म्हारै सपनै में आयो। म्हैं बीं नै ओळख लियो कारण कै एक दिन एक रस्तै चालती लुगाई आप री चप्पल काढ़ ली- रे धबिया, म्हैं कांईं थनै माजी दिखूं?” बो दिठाव ही हो जद पछै म्हैं उण तांगै वाळै नै गौर कर्‌यो कै बो हरेक चलतै नै बकारतो- चालो माजी कोटगेट।

सपनो ई क्या चीज हुवै कांईं कांईं नीं दिखाय देवै, बो म्हनै कैयो- भाई जी, बीड़ी पाओ।अर घणै सूतम री बात कै म्हैं ई ठाह नीं क्यूं खुद री चप्पल काढ़ ली अर उण नै कैयो कै- रे धबिया, म्हैं कांईं थनै बीड़ीबाज दिखूं?”

बीं रै गयां पछै म्हैं सपनै मांय विचारतो रैयो कै म्हैं उण री जरा सी फरमाइस माथै इंयां किंयां कैयग्यो। पण अबै कांईं कारी लागै। सपनै में उण पछै म्हैं आसै-पासै दुकानां नै जोवतो खासी आफळ करी कै कदास कोई दुकान लाध जावै। जे दुकान लाध जावै तो म्हैं बीड़ियां रो बंडळ लेयर दौड़तो जावूं अर उण नै पकड़ा देवूं। इत्तै मांय बो ई तांगै वाळो जाणै कठीनै सूं निकळर आयग्यो अर पागल कोटगेट माथै तांगो लिया ऊभो बोलै हो- चालो माजी कोटगेट।
***

Saturday, May 28, 2011

बाल साहित्य : जुगबोध अर विसयगत बदळाव


एक बगत हो जद घर मांय रात नै सूवण सूं पैली टाबरां नै दादी-नानी कहाणियां सुणायां करती, ठेठ गांवां तो बात म्हैं करूं कोनी, पण कस्बां अर सहरां मांय तो दादी-नानी खुद टाबरां भेळै सीरियल देखै का रात नै पोढण री करी । न्यारै-न्यारै चैनलां माथै परोसीजण वाळा सीरियल मांय कुण कित्तो सीरियस है आ कैवण री दरकार कोनी । टाबर घर सूं स्कूल, अर स्कूल सूं पाछो घरै काम रो भारो लियां आवै । आपरी पढाई-लिखाई अर खेला-कूदी रै सागै बुद्धु बगसै रो कोड बींनै सांस ई कोनी लेवण देवै कै बो बाल साहित्य रै आंगणै ढूकै । अबै करां बात माइतां री, तो बां नै टाबरां खातर बाल साहित्य बाबत सोचण री फुरसत कठै ? जिका स्यांणा-समझणा है बां वास्तै बाल साहित्य मिलण री ठौड़ कठै ? बाल साहित्य पेटै केई केई अबखायां है । बाल साहित्य लेखकां खातर कोई प्रकासक कोनी अर प्रकासक नीं हुवण रो कारण कैयो जावै कै बजार कोनी ।
कांई बाल साहित्य लेखक री आ जिम्मेदारी है कै बो बजार री मांग बाबत सोचै ? बजार नै लेखक पैली जाणै, पिछणै अर परखै, पछै उण मुजब लिखै ? असल मांय ओ संभव कोनी । कोई लेखक बजार री मांग नै तो बिसरा सकै, पण बगत री मांग तो उण नै परोटणी ई पड़ैला । कांई आज आपां रा बाल साहित्य लिखणिया लेखक बगत री मांग मुजब लिखण री खेचळ कर रैया है ? साच तो ओ है कै हाल तांई इण इक्कीसवीं सदी मांय ई बाल साहित्य लेखक चांद, सूरज, राजा, राणी, दरखत, कुत्ता, बिल्ली, ऊंट, बांदरां-बांदरी, खेल-तमासा रा गीत ई गावै अर टाबरां नै साव भोळा मानै । गद्य साहित्य री बात करां तो कांई आपां बाल साहित्य रै नांव माथै हाल तांई जूनी लोक कथावां री पुरसगारी सूं खुद नै मुगत नीं कर सकां ? जूनै साहित्य रो नुंवै साहित्य मांय सिरजाणाऊ प्रयोग हुवणो चाइजै ।
      सिरजण मांय रचनाकार आप रै बगत नै सागै लेयर चालै । बगत नै हरेक रचनाकार आप-आपरै हिसाब सूं परखै, पिछाणै अर परोटै । बगत रो सागो छोड़ियां पार नीं पड़ै क्यूं कै बगत री केई-केई बातां किणी पण रचना मांय रळीयोड़ी रैवै । रचनाकार बगत रो सागो करर चालै तद ई बो बगत सूं मेळ करतो थको आधुनिक सूं आधुनिक हुवैअर दूजै सबदां मांय कैवां तो ओ ई किणी पण परंपरा रो विकास हुया करै । रचना री पैली अर छेहली कसौटी जुगबोध नै मान सकां ।
आपां जाणां हरेक बगत रो आपूआप रो जुगबोध हुया करै अर जुगबोध री सीवां ई हरेक जुग रै हरेक बंधेज सूं रळियोड़ी रैवै । जुगबोध मांय बगत रा आरथिक, सामाजिक, सांस्कृतिक, धारमिक, राजनैतिक आद केई केई दीठाव आपां एकठ देख अर विचार सकां । रचना मांय विसय भेळै आपां नै  किणी खास जुगबोध रा दरसण ई हुया करै । बगत रै बदळियां जुगबोध ई बदळीजै अर ओ ई करण है कै किणी पण परंपरा री रचनावां मांय बगत बगत माथै आपां नै बदळाव दीसै । एक ओळी मांय कैवां तो बगत री खासियतां सूं रचना रो मेळ-मिळाप ही जुगबोध हुया करै । रचना रो विसय बगत रै हिसाब सूं बदळियां ई सरै, काल बाल साहित्य सिरजण पेटै रचनावां रै नांव माथै लोक कथावां सूं धाको धिकायो पण आज तो विग्यान अर कम्प्यूटर रै जुग मांय केई केई नुवां विसय आपां सामीं आय ऊभग्या है । टाबर अबै कम्प्यूटर, वीडियो गेम अर कार्टून नेटवर्क रो सोखीन है ।
हरेक नै आप री परंपरा माथै गुमेज हुवणो लाजमी है अर आपां री लोक साहित्य री परंपरा तो सिरै परंपरा है ई, कथाकार कमल रंगा रै सबदां मांय- आपां रै लोक साहित्य में बाल साहित्य रो लूंठो भंडार है, जिण में बालकथावां, बालगीत, आड्यां, अखाणां अर लोरियां आद री लूंठी धरोहर है । (जागती जोत, नवम्बर, 2002 ; पेज : 34) टाबरां खातर जिकी दादी-नानी री काहाणियां ही बै बाल साहित्य पेटै गिणा सकां । बाल साहित्य री पैली रचना पेटै बात करां तो बरस 1623 मांय गोरा बादल कवि जटमल री रचना नै बाल साहित्य री पैली रचना मानण रा दाखला मिलै ।
जूनै साहित्य पछै आधुनिक काल री बात करां तो सूर्यमल मिश्रण री पोथी राम रंजाट नै पैली बाल साहित्य री पोथी मानण री बात माथै कवि शिवराज भारतीय री बात सूं सहमत हुयो जाय सकै- आपां जद बाल साहित्य री बात करां तो बठै बालकां री मानसिकता नै ध्यान में राखर वां रै मनोरंजन अर विकास सारू लिख्यै साहित्य नै ही बाल साहित्य मानां । इण दीठ सूं रामरंजाट नै बाल साहित्य रै खांचै में खींचणो जचै कोनी । आ बात मानता थकां ई कहाणीकार मुरलीधर व्यास राजस्थानी रै कहाणी संग्रै बरसगांठ बाबत शिवराज भारतीय री आ टीप देखणजोग है- मुरलीधर व्यास बरसगांठ में सांतरी कहाण्यां टाबरां साम्हीं राखी । ( राजस्थली : अंक-100 ; पेज- 70) अर इणी ढाळै ई बाल साहित्य लेखका दीनदयाल शर्मा रो ई मानणो है- मुरलीधर व्यास ने बच्चों के लिए बरसगांठ जैसी सशक्त बाल कथा कृति के अलावा अनेक हास्य रेखाचित्र भी लिखे हैं । ( राजस्थानी बाल साहित्य : एक दृष्टि ; पेज : 6)
कहाणीकार मुरलीधर व्यास दांई आपरै आलेखां मांय कवि कन्हैयालाल सेठिया, चंद्रसिंह बिरकाळी अर मोहन आलोक आद नै ई बाल साहित्य लेखक साबित करण री आं कोसिस करी है । पैली बात तो आपां जाणां कै कोई रचना बाल-साहित्य री हुवै, उण खातर रचना मांय कांई कांई हुवणो जरूरी हुवै ? रंग-रूप री बात करां तो कमती पानां री पोथी अर मोटा मोटा आखरां मांय छपी पोथी बाल साहित्य री हुया करै, पण रचना मांय कीं दूजी जरूरी मांयली बातां बाबत ई आपां नै नीं विचारणो चाइजै ?  
कांई छोटी ऊमर मांय कोई लेखक रचना लिखै, उण नै ऊमर रै हिसाब सूं बाल साहित्यकार मानता थका उण री रचनावां नै बाल साहित्य मान लेवां ? आ मजाक हुय रैयी है । इणी खतर म्हैं ओ सवाल उठायो कै बाल साहित्य लेखन री रचना-विधि कांई हुवै, बाल साहित्य री रचना मांय बै किसी जरूरी बातां है जिसी हुया सूं ई कोई पण रचना बाल साहित्य री कैयी जावै अर जिण सूं ओ फैसलो पण करियो जावै कै आ रचना बाल साहित्य री है या कोनी ।
रचना रा बै आधार घटक अर मानकां री जाणकारी हुयां ई आपां ओ फैसलो कर सकालां । आपां बाल साहित्य लेखन री परंपरा नै सिमरध करण खातर नामी लेखक-कवियां नै जोड़ा जिकी बात तो ठीक है पण आं लेखकां नै बाल साहित्य लेखक मानण री भूल इण खातर नीं करणी चाइजै कै आं री सिरजण जातरा बाल साहित्य लेखन सूं साव जुदा रैयी है । जे इण ढाळै री सगळी रचनावां नै ई बाल साहित्य री पद्य रचनावां मांय सामिल करणी चावां तो आपां नैमाणक जुलाई-अगस्त, 2001 अंक देखणो चाइजै, जिको इणी ढाळै री रचवां माथै केंद्रीत है । अठै बाल साहित्य री सिमरध परंपरा अर बाल साहित्य री पैली पोथी बाबत शोध-खोज री जरूरत है ।
आजादी पछै रै बाल साहित्य लेखकां री विगतवार बात करां तो लगोलग लागै कै दो-च्यार लेखकां नै टाळ देवां तो कोई बाल साहित्य नै आज तांई गंभीरता सूं लियो ई कोनी । बाल साहित्य मतलब कोई सरल-सी चीज मानण री बाण बैठगी । गिणती रा बाल साहित्यकार है अर बां मांय सूं फगत बाल साहित्यकार रो तुगमो लियां तो दो-च्यार लेखक ई निगै आवै । पोथ्यां री बात करां तो बाल साहित्य री च्यार-पांच पोथ्यां लिखणवाळा कित्ता लेखक है ? आज तांई लिखीज्यै बाल साहित्य मांय जद विधावार फंटवाड़ो करर, पोथ्यां अर लेखकां बाबत कीं ठाह करां तो आपां नै आ संकड़ाई कीं बेसी लखावै । बाल कवितावां, बाल कथावां अर बाल नाटकां माथै तो काम हुयो है पण बाल साहित्य री केई केई विधावां तो हाल तांई अछूती पड़ी है, जिंयां- चित्र-कथावां, विज्ञान कथावां, निबंध, रेडियो नाटक आद ।
बाल साहित्य पेटै राणी राणी लक्ष्मीकुमारी चूड़ावत, मनोहर शर्मा, नानूराम संस्कर्ता, विजयदान देथा, गोविंद अग्रवाल, सूर्यशंकर पारीक, मूलचंद प्राणेश, करणीदान बारहठ, लक्ष्मीनारायण रंगा, जुगल परिहार आद रो काम ई घणो महतावूं कैयो जावैला । ऐ लेखक जूनी लोक कथावां नै सबदां मांय ढाळण रो लूंठो काम करियो, सागै-सागै आं मांय सूं केई लेखकां रो मौलिक लेखन ई सामीं आयो है । लोक साहित्य रा अमर साधकां जूनी लोककथावां नै सबदां रा बागा पैरावण रो काम करियो, जिण मांय केई केई लोककथावां री प्रस्तुति नै आपां बालकथा साहित्य मान सकां । इण ढाळै रै सगळै काम री सांतरी अंवेर माणक नवम्बर, 2001 अंक मांय हुई है । माणक रै इण अंक री एक जरूरी खासियत आ है कै लोककथावां रै सिरजणहारां रै नांवां आगै प्रस्तुति लिखर संपादक आपरी सूझ-बूझ नै प्रगट करी है, इण खातर माणक नै बधाई देवणी चाइजै । लोककथावां अर पद्यकथावां सूं आगै आज आपां नै बाल साहित्य नै लेय जावण री जरूरत है ।
डॉ संतोष परिहार शानू री बालकथा पिंकी री कहाणी रो दाखलो लेवां- नानी, एक कहाणी सुणा दै नीं ! देख, नीं तौ म्हैं फेरूं नानणै आवूंला कोनी ! पिंकी गरमी री छुट्टियां में नानाणै आयोड़ी ही, नै अबै जिद्द कर री ही । लेखिका इण में आगै नानी सूं कहाणी चालू करावै-काछवौ तौ लारै रैयग्यौ…। पण बिचाळै ई पिंकी री आ बात सगळा बाल साहित्य लेखकां खातर म्हनै ठीक लखावै- नीं-नीं, आ कहाणी कोनी सुणनी ! कोई नवी कहाणी सुणा नीं, नानी !इण बाल कथा मांय सहर में रैवण वाळी पिंकी खुद नानी नै एक कहाणी सुणावै । कहाणी मांय पूसी कैट है, फ्रीज है, ऊंदरा री मस्ती है अर छेकड़ मांय सीख है- लालच नीं करण री…। एक ओळी इणी कहाणी सूं देखो- उठीनै ऊंदरौ आपरै दोस्त नै मोबाइल माथै एसएमएस भेज रैयौ हौ कै- खतरौ टळग्यौ है, घंटी बांधवां री जरूरत कोनी ! आपरी एक बीजी बालकथा मांय टाबर नैमूरख चिड़ौ रै मारफत भरौसै री सीख तो दीवी है पण उण टाबर माथै भरौसो कर नै । लेखकां नै जाण लेवणो चाइजै कै बाल साहित्य रो मतलब फगत टाबरा नै सीख सीखावणी ई कोनी हुया करै । पंचतंत्र अर हितोपदेश रो आपरो टैम हो अर लोककथावां जिकै नै बांचणी है बो बांच लेसी पण आज बगत नै देखता थकां आपां नै बगत अर जुगबोध नै समझणो पड़ैला ।  
बरस 1978 अंतर्राष्ट्रीय बाल बरस रै रूप में मनाइज्यो अर टाबर-टोळी खातर कीं काम अठै सूं गति पकड़ै । इणी बरस मनोहर शर्मा नै बालवाड़ी पांडुलिपि खातर राजस्थान साहित्य अकादेमी, उदयपुर सूं पुरस्कार मिलणो एक सुभ संकेत हो । लोक कथावां का जीव-जिनावरां री कथावां ई फगत बाल साहित्य कोनी आ सीख राजस्थानी मांय पुखता करण पेटै एक संपादक लेखक रो नांव इतिहास घणै आदर सागै लेवैला अर बो नांव है- कथाकार बी.एल.माली अशांत’ रो । बै अर बांरा साथी साहित्यकार भानसिंह शेखावत बाल साहित्य पेटै घणो घणो काम करियो जिण री अंवेर हुवणी चाइजै । आप बाल साहित्य रै विगसाव खातर बाल साहित्य प्रकाशन ट्रस्ट सूं बाल साहित्य री पत्रिका झुंणझुणियो बरस 1978 लगैटगै 13 बरसां तांई निकाळी ।
आजादी पछै बाल साहित्य पेटै कीं गिणावजोग काम करण वाळा मांय सिरै नांव कथाकार भंवरलाल भ्रमर रो ई मानीजैला, क्यूं कै बां आपरै बाल-उपन्यास भोर रा पगलिया रै मारफत खरै अरथां मांय बालसाहित्य मांय कूं-कूं पगलियां मांडिया । अठै आपां नै पैली बार जुगबोध अर विसयगत बदळाव रो एक दीठाव देखण नै मिलै । ओ बो बगत हो जद लेखक चौबोली राणी री कथा का नानी रै घरै जावैतै झिंडियै री कथा लिखण मांय आपरी पूरी ताकत लगा रैया हा । बालसाहित्य रै नांव माथै इण जूनी पुरसगारी बिच्चै भ्रमरजी स्कूली जीवण सूं जुड़ियो एक मनोवैग्यानिक उपन्यास लिखर घणो महतावूं काम करियो । आगै इणी ढाळै रै विसय नै उठावतां थकां व्यंग्यकार बुलाकी शर्मा ई एक उपन्यास साच नै आंच नांव सूं लिख्यो । आं दोनूं बाल उपन्यासां मांय नुवीं घड़त सागै जुगबोध री सहजता, सरलता घणी असरदार दीसै । आं दोनूं लेखकां री खिमता है कै बै कथा मांय सीख सीखावण खातर किणी ढाळै री कोई अटकळ कोनी बरती ।
बरस 1980 सूं 1990 तांई री रचनावां मांय जुगबोध अर विसयगत बदळाव री दीठ सूं बी एल माली अशांत अर भानसिंह शेखावत खासो काम करियो । आपरी केई पोथ्यां अर रचनावां मांय बगत री मांग नै स्वीकारतां थकां सांतरां आखर मिल्या । लगैटगै बाल साहित्य री सगळी विधावां सागै अनुवाद रै मारफत ई आं बालसाहित्य रै भंडार नै भरण री कोसीस करी । बाल साहित्य प्रकाशन ट्रस्ट सूं ई बरस 1984 मांय कथाकार बुलाकी शर्मा रै संपादन मांयअचपळो चिड़ो नांव सूं बालकथावां रो संग्रै ई छप्यो । राजस्थानी पांच बाल कवि ( मोहन आलोक, मनोहरलाल गोयल, जयंत निर्वाण, नानूराम संस्कर्ता, बस्तीमल सोलंकी) आद प्रकासनां मांय आं लेखकां रो समरपण भाव प्रगटै । भारतीय अर बीजी भारतीय साहित्य री रचनावां री जाणकारी सूं राजस्थानी लेखकां मांय कांई लिखणो है कै जिको बगत मुजब भारतीय साहित्य रै नांव माथै आपां री सीर मानीजैला आ समझदारी आवती इण दौर रै लेखकां मांय देखी जाय सकै ।
लोककथावां मांय एक नुवीं दीठ रो बरताव केई लेखकां करियो, दाखलै रूप कवि लक्ष्मीनारायण रंगा री बालकथावां री पोथी हरिया सुवटिया नै लेवां जिण बाबत कथाकार कमल रंगा री टीप है- इण पोथी में राजस्थानी बाल लोककथावां नै एक नुवै शिल्प में लेखक ढाळै तो अठै नुंवी दीठ नै आधुनिकता बोध देवण रो काम हुयो । (जागती जोत, नवम्बर, 2002 ; पेज : 34) दुलाराम सारण री बालकथा राजा री सूझ मांय लोककथात्मक बुणगट मांय बात नै जिण ढाळै राखण री लेखकीय चतराई मिलै जिण सूं छेकड़ तांई कथा मांय उमाव बण्यो रैवै । घणीखरी बालकथावां मांय कथा थोड़ीक चालू हुवतां ई अंत ठाह लाग जावै कै आगै कांई हुवैला जिंयां खुद दुलाराम री बालकथा नकल रौ नतीजौ नै लेवां या मदनगोपाल लढ़ा ई धुंवै रा गोट, नांव सूं ई ठाह लागै कै कथा कांई हुवैला इण सूं जुदा राजा री सूझ कथा मांय छेहली ओळी तांई भेद कोनी खुलै । जूनै साहित्य मांय सूं रामायण रै प्रसंग नै उठावतां थका विष्णु भट्ट री बालकथाशिष्टाचार री सीख मांय घणी रोचकता रंजकता देखी जाय सकै ।
बरस 1983 मांय राजस्थानी भाषा, साहित्य अर सस्कृति अकादमी थापित हुया पछै बालसाहित्य री केई-केई पोथ्यां सामीं आई । बालसाहित्य रै विगसाव पेटै अकादेमी कानीं सूं बाल साहित्य पुरस्कार बरस थापित हुयां पछै केई लेखक बाल साहित्य लेखक रूप थापित हुया, पण बी. एल. माली अशांत, भानसिंह शेखावत अर भंवरलाल भ्रमर आद रो नांव बाल साहित्य नै राजस्थानी मांय थापित करणवाळा भेळै हरावळ लियो जावैला ।
बाल साहित्य केई जूनै लेखकां मांय जिंयां जयंत निर्वाण, मोहन मंडेला, रामनिरंजन ठिमाऊ आद मांय जुगबोध अर विसयगत बदळाव री केई सींवां निजर आवै । टाबरां नै सीख सीखावणो ई आं रो मकसद रैयो । नुवीं दीठ रो विगसाव ए. वी. कमल, मनोहर सिंह राठौड़, नवनीत पाण्डे, रवि पुरोहित, मदनगोपाल लढ़ा, शिवराज भारतीय, मनोजकुमार स्वामी, राजूराम बिजारणियां, दुलाराम सारण, श्रीभगवान सैनी आद लेखकां मांय देख्यो जाय सकै ।
जुगबोध अर विसयगत बदळाव री बात लेखक-दीठ बात करां तो आपां नै एक नांव चेतै आवै दीनदयाल शर्मा रो, जिका आपरी पुखता ओळखण बाणाई है । बां इण दिस लगोलग लेखन करियो- चन्दर री चतराई (1992), टाबर टोळी (1994), शंखेसर रा सींग (1998), तूं कांईं बणसी (1999), म्हारा गुरुजी (1999), बात रा दाम (2003) अर बाळपणै री बातां (2009) आद पोथ्यां लगैटगै बीस बरसां री लेखन-जातरा है जिकी भरोसो बंधावै कै आप पक्का बाल साहित्यकार है । आं रै लेखन सूं परखत लाखावै कै आपरै घरै अर स्कूल मांय आप टाबरां भेळै रम्योड़ा ई रैवै । संस्मरण लेखन पेटै बाळपणै री बातां पोथी आज तांई छपी सगळी पोथ्यां सूं फगत वजन मांय ई भारी कोनी, जुगबोध अर विसगत बदळाव खातर ई आ पोथी घणी घणी महतावू मानी जावैला । बाल साहित्य लेखन खातर बालक जैड़ो भोळो मन चाइजै अर बो दीनदयाल जी पाखती है । भोळप इत्ती है कै बाळपणै री बातां पोथी री भूमिका मन री बात नै इत्ती लम्बी मांडी है कै भूमिका खुद पोथी दांई है ।
घर रै टाबरां मांय एक लेखक रो रमणो बाळपणै री बातां मांय सांगोपांग उजागर हुवै ।  आं रै घर-परिवार रै मिस इण पोथी मांय आपां बदळतै जुग रा केई-केई दीठाव देख सकां ।चंदन री चतराई (1992) पोथी री पैली कहाणी साचै री जीत री जिकी भैंस ही बा दूसरबाळपणै री बातां (2009) मांय गा बणर आयगी । एक सागण बात नै लेखक कीं नेठाव मांडर पाछी कैवै । बाल नाटकां मांय दीनदयाल शर्मा अर मनोज कुमार स्वामी घणी सावचेती सूं कम सूं कम साज-सज्जा बरतता थकां आधुनिक नातक लिख्या । दीनदयाल शर्मा रो म्हारा गुरुजी आपरै व्यंग्य रै कारण, बात रा दाम चतराई री बात अर तूं कांईं बणसी आपरी सीख रै कारण उल्लेखजोग मान्या जावैला । बावळी बस्ती जैड़ा हास्य एकांकी टाबर घणा दाय करै पण बाल साहित्य मांय हास्य रचनावां घणी कोनी लिखीजी ।
बाल साहित्य री पद्य रचनावां री बात करां तो छंद तय ताल वाळी रचनावां घणी असरदार हुय सकै जद कै नुंवी कवितावां जैड़ी छंद मुगत कवितावां मांय बा बात बणै कोनी बणै, जद कै बाल कवितावां रै नांव माथै देस, घर-परिवार, जीव-जिनावरां, जीवण-मोल अर सीख-संस्कारां नै केवटण वाळी कवितावां कवियां घणी लिखी है । जे बालकवितावां मांय जुगबोध अर विसयगत री बात करां तो रुपियै मांय बारा आना रचनावां तो पूरी छोड़ ई देवां, कारण कै बां मांय बदळाव देखण नै साव कमती मिलै ।
सगळा बाल कवियां आ मानर लिखै कै टाबर नै सीख देवणी है- बात करां तो देवी-देवतावां री करलां, सरसत माता री करला- सुरसत माता सिंवरूम थांनै / ग्यान ऊजाळो दे-दे म्हांनै । ( छांटड़ली / किशोरकुमार निर्वाण ; पेज-9) केई कवि गणेसजी री धावना करसी तो आपां रा बाकी रा देवी देवता अर दूजै धरमां री सीख सीखावतां पैली तो उण टाबर नै धरम मांय जकड़ देवालां, आप नै चाइजै कै उण नै हिंदू अर मुसळमान कै सिख-इसाई उण नै कम सूं कम आपां रो बाल साहित्य तो ना बणावै । ओ काम तो समाज हाफी कर देसी । टाबर खातर तो मा सूं मोटो भगवान कुण है ? लाड-कोड रो समदर मां / मो, ममता रो मिंदर मां / चोखी-चोखी बात सुणावै । लोरी गार सुआवै मां । शिवराज भरतीय री आ बात तो फेर ई समझ में आवै पण मोर बैठती माता शारदा / थांकै तंबूरो हाथ में / ज्ञान, ध्यान अर भक्ति दीज्ये / रीज्ये मावड़ साथ में …। कांई कवि किशनलाल गावरी री इण ओळियां मांय छोटा-छोटा हाथां अर छोटै मूंडै घणी मोटी बात नीं मांग रैयो है- इत्तो ज्ञान, ध्यान अर भक्ति टाबर नै अबार ई मिल जावैला तो बो राखैला कठै ? बो तंबूरै कानी फगत अचरज सूं देख ही सकै, उण री माया अर सुर समझण री उण री उमर कठै ?इणी ढालै कवि रामनिरजंन ठिमाऊ री ओळियां है- एक ही टाबर सैं सूं आछ्यो / ओ होवै परवार नियोजन / ज्यादा टाबर चोखा कोनी / मिलै न बां नै पूरो भोजन । म्हैं माफी चावूं ठिमाऊ जी री आ कविता तो किणी स्लोगन दांई है अर टाबरां खातर तो नीं पण नुंवै परणियै घणी-लुगाई खातर बेसी है ।  
बाल कवितावां मांय राजस्थान अर धरती रो बखाण, जीव-जिनावरां, बदळती रुतां भेळै प्रक्रति बाबत कवितावां बेसी लिखीजी है । अठै केई कवियां तो लोक साहित्य नै ई परोटातां थकां कोई नुवीं बात नीं लिख परा बै सागण जूनी बातां न्यारै-न्यारै सबदां मांय लिखै, दाखलै सारू मईनुदीन कोहरी री बाल कविता पोथी मोत्यां सूं मैंगी री ओळियां लेवां-  म्हारा काळा कागलिता रे, / तूं कांई संदेशो लायो रे । / कांव-कांव तूं घणो करै, / डरूं-फरूं तूं घणो डरै ।  च्यारूं दिशावां तूं उड़ै फिरै, / गांव गोठ री तूं खबर करै ।
कवितावां मांय टाबर जीव, जानवर अर जंगळ नै घणो दाय करै तो अब्दुल समद राही लिखै- बांदर मामो चसमौ लेनै / बांचै है अखबार, / उण में पढ़ियौ जंगळ में ई / खासौ बढगौ खार । तो बात कीं ओपती लागै पण खासौ खार बढै कोनी बधै लिखण री जरूरत ई समझणी पड़ैला । खासौ बधग्यौ खार हुवणो चाइजै । बाल साहित्य मांय सबदां रै बरताव पेटै खास ध्यान देवण री जरूरत है । लाडेसर पोथी रा कवि नवनीत पाण्डे री कविता री ऐ ओळियां देखो, जिण सूं ठा पड़ै कै ओ जुग टाबर नै कित्तो समझवान बणा दियो है –“मास्टर जी क्यूं डण्डा मारो / कांई तो सोचो, कीं तो विचारो / सांची बोलो- ईंयां ई मरता / जे म्हैं होंवतो बेटो थारो । कवि रवि पुरोहित री पोथी तिरंगो मांय कीड़ी कविता है जिकी सीखो, सीखो, सीखो इण सूं सीखो सीख रो पाठ पढावै पण कवि कृष्णकुमार बान्दर री अड़ीपा पोथी- झगड़ बिलोवणो खाटी छा रै मारफत कैयो जाय सकै कै बाल कवितावां मांय केई कवितावां नुंवै जुगबोध नै पोखण वाळीअर विसयगत बदळाव लिया घणी सरावणजोग कवितावां ई लिखीजी है- साधन आया बीसियां / ऊपर-थळी जनेती / लाडू-बूंदी जूंठी छोड़ै / घरां रोटियां छेती / दूसर-तीसर बड़ै टैंट में / खा-खा लेवै मजा / अड़ीपा हा हा; हा; / अड़ीपा हा ! / फोटू आळो पळका मारै / मूवी आळो सागै / बाजो बाजै गांम ऊपर कर / कार बनै री आगै / नाचै लुगडर भोत सूगला / सरम गेरी दी सा /  अड़ीपा हाहा; हा; / अड़ीपा हा ! टाबरां री बाल कविता तो अरथ सीख सूं बेसी मनोरंजन अर खेल-तमासा है । किणी पण साहित्य मांय सीधी सीधी सीख नीं हुया करै जिकै मांय बाल साहित्य मांय तो घणी घणी सावचेती री दरकार हुया करै । जिकी बाल कवितावां मांय कीं लय, सुर, ताल, संगीत भेळै जे टाबर मुळकै, गावै, हांसै तो उण री सारथकता समझी जावैला । कृष्णकुमार बान्दर कवि जी री एक कविता भळै देखो- बोल्यो मुरगलो- कुकडूं-कू / तन्नै जगावण आयो हूं / इण सूं आगै री ओळियां है- उठ कमेड़ी सूती क्यूं / कुकड़ूं-कूं - कुकड़ूं-कूं / चिड़ी-कागला सगळा जाग्या / देख मोरिया न्हागे आग्या / बेगी काम लागज्या तूं / कुकड़ूं-कूं - कुकड़ूं-कूं । इण ढाळै आ कविता आगै चालै अर इण मिस आपां कह सकां कै बाल साहित्य मांय विकास री घणी-घणी संभावनावां है ।
साहित्य अकादेमी, नवी दिल्ली कानी सूं बरस 2010 रो बाल साहित्य पुरस्कारबुलबुल रा बोल (बालकथावां) दमयंती जाडावत चंचल नै मिलणो एक सुभ संकेत है । म्हारो मानणो है कै इण सूं प्रेरणा मिलैला अर बाल साहित्य रा जूना लेखकां मांय चेतना जागैला, सागै ई सागै केई नुवां रचनाकार ई आपरी नुवीं ऊरमा लियां बाल साहित्य सिरजण मांय सामीं आवैला । दमयंती जाडावत री बालकथा टूटू री बात करां जिण मांय सूवटौ अर सूवटी रो मानवीयकरण नुंवी दीठ सूं लेखिका करियो है । जंगळ रा सगळा सूवटां री गोठ मांय नुंवी बात पाइनेपल री आइसक्रीम अर टूटू रै मारफत टाबरां नै सीख दी है । म्याऊं बालकथा मांय कम सबदां मांय घणी चतराई सूं शीला नै बाहुदर अर हिम्मत वाळी बेटी बणण री सीख मिलै ।
कैयो जावै कै बाल साहित्य पेटै साक्षारता अर उत्तर साक्षरता आंदोलन रै मारफत ई घणी तेजी सूं काम हुयो है । पूरै राजस्थान मांय जिलावार केई केई लेखकां री पोथ्यां प्रकाशकां छापी तो खुद लेखक ई आपरी पोथ्यां छापी । इण काम मांय जिती तेजी आई पाछी उत्ती ई पाछी मंदी बेगी ई  आयगी । तद आपां आ मान सकां कै ओ सगळो काम आपरै हिसाब सूं हुयो अर इण सजावटी काम री फगत सोभा ई बखाणी जाय सकै, असल मांय ओ काम बाल साहित्य रै खातै हुयो ई कोनी । आज जरूरत है कै अनुवाद रै मारफत बाल साहित्य री सिरै पोथ्यां राजस्थानी मांय आवै । अनुवाद रै सागै सागै मौलिक बाल साहित्य सिरजण मांय जुगबोध नै परोटतां थकां आज रै बगतावू रंगां नै पोखण वाळो सिरजण बाल साहित्यकार करैला तद ई आपां इस दिस विगतवार बात कर सकालां ।
****
दिसम्बर, 2010
 (भाई श्री रवि पुरोहित खातर)
डॉ. नीरज दइया
Mob.   : 9461375668

Tuesday, May 24, 2011

आलोचना रै आंगणै / नीरज दइया

आलोचना रै आंगणै री विगत
1. आधुनिक कविता रा साठ बरस 
2. अर्जुनदेव चारण रै नाटकां में नारी 
3. आधुनिक कहाणी : शिल्प अर संवेदना 
4. बा जीवैला अर घाड़फाड़ जीवैला 
5. नामी कवि री नामी कहाणियां 
6. लघुकथा री विकास-जातरा 
7. नारी री ओळख नै आथड़ता आखर 
8. राजनीति अर नारी जीवण रो बखाण 
9. जीवण-जुद्ध जूझती लुगाई-जात 
10. एक जुग री राम कहाणी 
11. आधुनिकता नै स्वीकारती परंपरागत कथा 
12. सारथक सबदां रा साधक सेठिया जी 
13. ओ जीवण है, है ज्यूं खिंडियोड़ो सो……
14. प्रेमजी प्रेम री सिरजण-जातरा
15. एक कथाकार री सोनलिया कथा
16. साहित्य दरसाव : बरस 1999 
17. शिक्षक दिवस प्रकाशन : एक परख 
18. राजस्थानी साहित्य रै गोखै सूं लारला दस बरस

Tuesday, May 10, 2011

आलोचना रै आंगणै


म्हारी पैली आलोचनात्मक निबंधां री पोथी बोधि प्रकाशन, जयपुर सूं आई है। कैयो जाय सकै कै “आलोचना रै आंगणै” समकालीन राजस्थानी आलोचना री पैली पोथी है। अठै सवाल कर्‌यो जाय सकै कै राजस्थानी मांय हाल तांईं कांईं कोई आलोचना री पोथी छपी ई कोनी कांईं? इण रो जबाब है कै पोथ्यां तो दसूं छपी पण इण ढाळै री आ पैली ई है। हाल तांईं छपी सगळी पोथ्यां मांय विधावां माथै का खास खास पोथ्यां माथै आलेख मिलता रैया है। अर खरी बात कैवण री हिम्मत करां तो पखापखी केई जागा धाप’र हुई है। आलोचना मांय हुवती उठा-पटक सूं अळधै अठै किणी लेखक, पोथी का विधा माथै बिना किसी संकै रै खरी-खरी बातां मिलैला जिकी केई जागा खारी ई लागैला। पण रचना रै पाठ माथै भरोसो करण री दीठ इण पोथी मांय संकलित आलेखां मांय बारंबार आप नै मिलैला। लारलै बीस-बाईस बरसां मांय न्यारै न्यारै विषयां माथै लिख्योड़ा इण आलेखां सूं म्हारी दीठ सूं आप आधुनिक साहित्य रो पूरो-पूरो उणियारो आपां देख सकोला।

विविधा, सूरतगढ़ रै कार्यक्रम मांय

राजस्थान साहित्य अकादेमी, उदयपुर रै “लेखक से मिलिए” कार्यक्रम बडेरचारो वरिष्ठ कवि श्री मोहन आलोक री 
साख मांय आपरी बात राखता tथका डॉ. नीरज दइया ।

Monday, May 09, 2011

सात रचनाकारां भेळै आठवों म्हैं यानी नीरज दइया

सर्वश्री भंवरलाल भ्रमरनीरज दइया, आईदानसिंह भाटी, बुलाकी शर्मा, मालचंद तिवाड़ी, नवनीत पाण्डे, कुंदन माली अर मदन सैनी
 
(कथा समारोह, जोधपुर

डॉ. नीरज दइया की प्रकाशित पुस्तकें :

हिंदी में-

कविता संग्रह : उचटी हुई नींद (2013), रक्त में घुली हुई भाषा (चयन और भाषांतरण- डॉ. मदन गोपाल लढ़ा) 2020
साक्षात्कर : सृजन-संवाद (2020)
व्यंग्य संग्रह : पंच काका के जेबी बच्चे (2017), टांय-टांय फिस्स (2017)
आलोचना पुस्तकें : बुलाकी शर्मा के सृजन-सरोकार (2017), मधु आचार्य ‘आशावादी’ के सृजन-सरोकार (2017), कागद की कविताई (2018), राजस्थानी साहित्य का समकाल (2020)
संपादित पुस्तकें : आधुनिक लघुकथाएं, राजस्थानी कहानी का वर्तमान, 101 राजस्थानी कहानियां, नन्द जी से हथाई (साक्षात्कार)
अनूदित पुस्तकें : मोहन आलोक का कविता संग्रह ग-गीत और मधु आचार्य ‘आशावादी’ का उपन्यास, रेत में नहाया है मन (राजस्थानी के 51 कवियों की चयनित कविताओं का अनुवाद)
शोध-ग्रंथ : निर्मल वर्मा के कथा साहित्य में आधुनिकता बोध
अंग्रेजी में : Language Fused In Blood (Dr. Neeraj Daiya) Translated by Rajni Chhabra 2018

राजस्थानी में-

कविता संग्रह : साख (1997), देसूंटो (2000), पाछो कुण आसी (2015)
आलोचना पुस्तकें : आलोचना रै आंगणै(2011) , बिना हासलपाई (2014), आंगळी-सीध (2020)
लघुकथा संग्रह : भोर सूं आथण तांई (1989)
बालकथा संग्रह : जादू रो पेन (2012)
संपादित पुस्तकें : मंडाण (51 युवा कवियों की कविताएं), मोहन आलोक री कहाणियां, कन्हैयालाल भाटी री कहाणियां, देवकिशन राजपुरोहित री टाळवीं कहाणियां
अनूदित पुस्तकें : निर्मल वर्मा और ओम गोस्वामी के कहानी संग्रह ; भोलाभाई पटेल का यात्रा-वृतांत ; अमृता प्रीतम का कविता संग्रह ; नंदकिशोर आचार्य, सुधीर सक्सेना और संजीव कुमार की चयनित कविताओं का संचयन-अनुवाद और ‘सबद नाद’ (भारतीय भाषाओं की कविताओं का संग्रह)

नेगचार 48

नेगचार 48
संपादक - नीरज दइया

स्मृति में यह संचयन "नेगचार"

स्मृति में यह संचयन "नेगचार"
श्री सांवर दइया; 10 अक्टूबर,1948 - 30 जुलाई,1992

डॉ. नीरज दइया (1968)
© Dr. Neeraj Daiya. Powered by Blogger.

आंगळी-सीध

आलोचना रै आंगणै

Labels

101 राजस्थानी कहानियां 2011 2020 JIPL 2021 अकादमी पुरस्कार अगनसिनान अंग्रेजी अनुवाद अतिथि संपादक अतुल कनक अनिरुद्ध उमट अनुवाद अनुवाद पुरस्कार अनुश्री राठौड़ अन्नाराम सुदामा अपरंच अब्दुल वहीद 'कमल' अम्बिकादत्त अरविन्द सिंह आशिया अर्जुनदेव चारण आईदान सिंह भाटी आईदानसिंह भाटी आकाशवाणी बीकानेर आत्मकथ्य आपणी भाषा आलेख आलोचना आलोचना रै आंगणै उचटी हुई नींद उचटी हुई नींद. नीरज दइया उड़िया लघुकथा उपन्यास ऊंडै अंधारै कठैई ओम एक्सप्रेस ओम पुरोहित 'कागद' ओळूं री अंवेर कथारंग कन्हैयालाल भाटी कन्हैयालाल भाटी कहाणियां कविता कविता कोश योगदानकर्ता सम्मान 2011 कविता पोस्टर कविता महोत्सव कविता-पाठ कविताएं कहाणी-जातरा कहाणीकार कहानी काव्य-पाठ किताब भेंट कुँअर रवीन्द्र कुंदन माली कुंवर रवीन्द्र कृति ओर कृति-भेंट खारा पानी गणतंत्रता दिवस गद्य कविता गली हसनपुरा गवाड़ गोपाल राजगोपाल घिर घिर चेतै आवूंला म्हैं घोषणा चित्र चीनी कहाणी चेखव की बंदूक छगनलाल व्यास जागती जोत जादू रो पेन जितेन्द्र निर्मोही जै जै राजस्थान डा. नीरज दइया डायरी डेली न्यूज डॉ. अजय जोशी डॉ. तैस्सितोरी जयंती डॉ. नीरज दइया डॉ. राजेश व्यास डॉ. लालित्य ललित डॉ. संजीव कुमार तहलका तेजसिंह जोधा तैस्सीतोरी अवार्ड 2015 थार-सप्तक दिल्ली दिवाली दीनदयाल शर्मा दुनिया इन दिनों दुलाराम सहारण दुलाराम सारण दुष्यंत जोशी दूरदर्शन दूरदर्शन जयपुर देवकिशन राजपुरोहित देवदास रांकावत देशनोक करणी मंदिर दैनिक भास्कर दैनिक हाईलाईन सूरतगढ़ नगर निगम बीकानेर नगर विरासत सम्मान नंद भारद्वाज नन्‍द भारद्वाज नमामीशंकर आचार्य नवनीत पाण्डे नवलेखन नागराज शर्मा नानूराम संस्कर्ता निर्मल वर्मा निवेदिता भावसार निशांत नीरज दइया नेगचार नेगचार पत्रिका पठक पीठ पत्र वाचन पत्र-वाचन पत्रकारिता पुरस्कार पद्मजा शर्मा परख पाछो कुण आसी पाठक पीठ पारस अरोड़ा पुण्यतिथि पुरस्कार पुस्तक समीक्षा पुस्तक-समीक्षा पूरन सरमा पूर्ण शर्मा ‘पूरण’ पोथी परख प्रज्ञालय संस्थान प्रमोद कुमार शर्मा फोटो फ्लैप मैटर बंतळ बलाकी शर्मा बसंती पंवार बातचीत बाल कहानी बाल साहित्य बाल साहित्य पुरस्कार बाल साहित्य समीक्षा बाल साहित्य सम्मेलन बिणजारो बिना हासलपाई बीकानेर अंक बीकानेर उत्सव बीकानेर कला एवं साहित्य उत्सव बुलाकी शर्मा बुलाकीदास "बावरा" भंवरलाल ‘भ्रमर’ भवानीशंकर व्यास ‘विनोद’ भारत स्काउट व गाइड भारतीय कविता प्रसंग भाषण भूमिका मंगत बादल मंडाण मदन गोपाल लढ़ा मदन सैनी मधु आचार्य मधु आचार्य ‘आशावादी’ मनोज कुमार स्वामी मराठी में कविताएं महेन्द्र खड़गावत माणक माणक : जून मीठेस निरमोही मुकेश पोपली मुक्ति मुक्ति संस्था मुरलीधर व्यास ‘राजस्थानी’ मुलाकात मोनिका गौड़ मोहन आलोक मौन से बतकही युगपक्ष युवा कविता रक्त में घुली हुई भाषा रजनी छाबड़ा रजनी मोरवाल रतन जांगिड़ रमेसर गोदारा रवि पुरोहित रवींद्र कुमार यादव राज हीरामन राजकोट राजस्थली राजस्थान पत्रिका राजस्थान सम्राट राजस्थानी राजस्थानी अकादमी बीकनेर राजस्थानी कविता राजस्थानी कविता में लोक राजस्थानी कविताएं राजस्थानी कवितावां राजस्थानी कहाणी राजस्थानी कहानी राजस्थानी भाषा राजस्थानी भाषा का सवाल राजस्थानी युवा लेखक संघ राजस्थानी साहित्यकार राजेंद्र जोशी राजेन्द्र जोशी राजेन्द्र शर्मा रामपालसिंह राजपुरोहित रीना मेनारिया रेत में नहाया है मन लघुकथा लघुकथा-पाठ लालित्य ललित लोक विरासत लोकार्पण लोकार्पण समारोह विचार-विमर्श विजय शंकर आचार्य वेद व्यास व्यंग्य व्यंग्य-यात्रा शंकरसिंह राजपुरोहित शतदल शिक्षक दिवस प्रकाशन श्याम जांगिड़ श्रद्धांजलि-सभा श्रीलाल नथमल जोशी श्रीलाल नथमलजी जोशी संजय पुरोहित संजू श्रीमाली सतीश छिम्पा संतोष अलेक्स संतोष चौधरी सत्यदेव सवितेंद्र सत्यनारायण सत्यनारायण सोनी समाचार समापन समारोह सम्मान सम्मान-पुरस्कार सम्मान-समारोह सरदार अली पडि़हार संवाद सवालों में जिंदगी साक्षात्कार साख अर सीख सांझी विरासत सावण बीकानेर सांवर दइया सांवर दइया जयंति सांवर दइया जयंती सांवर दइया पुण्यतिथि सांवर दैया साहित्य अकादेमी साहित्य अकादेमी पुरस्कार साहित्य सम्मान सीताराम महर्षि सुधीर सक्सेना सूरतगढ़ सृजन कुंज सृजन संवाद सृजन साक्षात्कार हम लोग हरदर्शन सहगल हरिचरण अहरवाल हरीश बी. शर्मा हिंदी अनुवाद हिंदी कविताएं हिंदी कार्यशाला होकर भी नहीं है जो