पुस्तक समीक्षा / डॉ. नीरज दइया
1/16/2021 |
No comments |
आखै देस मांय आज जे किणी रै बिच्यारां रो डंको बाजै तो फगत गांधी जी रो नांव लेय सकां। गांधी जी रै लिखित साहित मांय ठौड़-ठौड़ गुजराती, अंग्रेजी अर हिंदी मांय मातभासा रै पख मांय दाखला मिलै। राजस्थानी रा हेताळू अर ऊरमावान अनुसिरजक डॉ. जितेंद्र कुमार सोनी घणी खमचाई सूं गांधी जी रा भणाई पेटै विचारां नै अंवेरण रो काम कर’र घणी सूझ-बूझ साथै आ पोथी आपां साम्हीं लाया है। इण संचै अर उल्थै बाबत कवि-कथाकार रामस्वरूप किसान मिनख सरीर रा पांच तत्त्वां भेळै छठै तत्त्व भणाई नै जोड़ता अखरावै- ‘इण लेखै भणाई नै छठो तत्त्व ई कैयो जा सकै। तो अबार सवाल उठै कै इण छठै तत्त्व नै हासल करबा रो सैंग सूं सबखो मारग कुणसो है? इण सवाल रो सांचो अर सटीक पड़ूत्तर है आ पोथी। इण रो राजस्थानी मांय आवणो अणमोल्यै धन रो आवणो है।’
अनुसिरजक डॉ. जितेंद्र कुमार सोनी घणै जतन सूं गांधी जी रै बिच्यारां री अंवेर कर’र बां नै आठ पाठां मांय जचाया है। पोथी मांय गांधी जी रो खुद रो तजरबो जिको ‘हरिजनसेवक’ मांय 09-07-1938 मांय छप्यो उण रो राजस्थानी उल्थो बांचतां लखावै जाणै खुद गांधी जी राजस्थानी मांय बोलता थकां आपां नै समझावण देय रैया है। किणी पोथी री सगळा सूं लांठी बात उल्थै लेखै इण सूं बेसी भळै कांई हुवैला कै इण री भासा मांय गांधी जी रो लटको ठौड़ ठौड़ मैसूस हुवै। इण पोथी परख नै बांचणियां जिका फिल्म मांय मुन्नाभाई नै देख्योड़ा है, बै आ पोथी बांचता मैसूस करैला जाणै आखरां रची इण पोथी सूं गांधी जी बारै आय’र आपां साम्हीं ऊभ जावै अर बै मातभासा बाबत बंतळ करण ढूकै। गांधी जी मुजब बाळकां री भणाई उणां री मातभासा मांय हुवणी जरूरी है, जे मातभासा मांय उणा री सिख्या हुवैला तो बां रो टैम बचैला अर देस आगै बधैला। अठै गांधी जी खुद रै जीवण री निजू केई बातां रै हवालै आ बात साबित करै कै भणाई खुद री भासा मांय ई हुवणी चाइजै। इण पोथी नै प्रामाणिक बणावण खातर हरेक बात पछै उण रो दाखलो तारीख समेत मिलै कै कुण सा बिच्यार कठै सूं लियोड़ा है अर किण तारीख नै बै छप्योड़ा है।
पोथी मांय विदेसी मध्यम रो असर, अंग्रेजी बनाम मातभासा, जापान री मिसाल आद केई विसयां पेटै गांधी जी रा विच्यार अंवेरता थकां अनुसिरजक जाणै राजस्थान रै रैवासियां साम्हीं अमोलक हेमाणी सूंपै कारण कै जद सरकारू नवी शिक्षा नीति मांय भणाई री बात मातभासा मांय करावण री बात खास रूप सूं राखीज चुकी है। ‘भणाई रो मारग’ पोथी मांय अंग्रेजी का किणी भासा रो कोई विरोध कोनी बस आपां रै हक री बात करणियां साम्हीं अनुसिरजक सोनी अहिंसा रा पुजारी गांधी जी री लाठी हाथां झलावण रो काम करै। आज री बात करां तो गांधी जी बातां साब साची लखावै, अंग्रेजी हरेक भारतवासी खातर जरूरी कोनी बस कीं टाळवां मिनखां खातर जरूरी हुय सकै है। मिनख नै देस-दुनिया री सगळी बातां-जाणकारियां खुद री भासा मांय मिलण री बात गांधी जी कैयग्या। भास ग्यान रै विगसाव खातर हुवै जद कै मातभासा सूं कटियोड़ा मिनख मिनखाजूण मांय कीं नीं कर सकै अर इण नै इयां पण कैय सकां नै बै जित्तो कीं करण री खिमता राखै बो उत्तो नीं कर सकै। गांधी जी बनारस हिंदू यूनिवर्सिटी पेटै ई आ बात कैयी- ‘म्हैं आस करूं कै आ यूनीवर्सिटी इण बात रो इंतजाम करैली कै जका जवान छोरा-छोरी अठै भणबा आवै, बांनै बांरी मातभासा रै मरग सिख्या मिलै। आपणी भासा आपणो पड़बिंब हुवै है, अर जे आप कैवो कै आपणी भासावां सांवठै बिच्यारां नै परगट करण मांय असमरथ है, तो म्हैं कैबूंला कै जित्ती बेगी इण दुनिया सूं आपणी हस्ती मिट जावै, बित्ती ई चोखी है।’ (पेज-24) असल मांय आ पोथी राजस्थानियां री बिना राजस्थानी भासा रै जिकी हस्ती मिटती जाय रैयी है का मिटावण री साजिस चाल रैयी है उण पेटै आपां नै सावचेत करै।
भारत री न्यारी न्यारी भासावां री लिपि अर रोमन लिपि पेटै ई बिच्यार छेहलै पाठ ‘लिपि री बात’ मांय मिलै। जिका चावै कै रोमन लिपि हुवणी चाइजै बां साम्हीं ओ ‘हरिजन सेवक’ रै दोय अंकां मांय गांधी जी री आं बातां सूं खुलासो हुवै कै देवनागरी लिपि देसभगती अर देसप्रेम रो प्रतीक है।
इण पोथी नै ‘भणाई रो मारग’ नीं कैय’र राजस्थानी रा हेताळूं जे ‘गांधी री लाठी’ कैवै तो ई बेओपती बात नीं हुवैला, क्यूं कै आ ई बा लांठी लाठी है जिकी आपांरै आवतै बगत भासा मानता रै काम मांय काम आवैला। गांधी जी रै इत्तो कैयां पछै अर आं प्रमाणां रै हुवता थका ई जे कोई कानां ठेठी राखै तो कोई कांई कर सकै। इण पोथी रो दूजो महतावू पख आवरण चितराम अर न्यारै-न्यारै चितरामां सूं सजावण वाळा चावा-ठावा चित्रकार रामकिशन अडिग री दीठ अर बोधि प्रकाशन री छपाई नै ई मान सकां जिण सूं पोथी मनमोवणी अर संग्रैजोग बणी है।
पोथी : भणाई रो मारग (अनुवाद) / मूल : महात्मा गांधी / संचै अर उल्थो : डॉ. जितेंद्र कुमार सोनी / प्रकाशक : बोधि प्रकाशन, जयपुर / संस्करण : सितम्बर, 2020 / पेज : 32 / मोल : 50/-
