राजस्थानी उपन्यास "अवधूत"
अवधूत : मिनख नै मिनख सूं जोड़ण रो जतन ==========================
गद्य साहित्य री आधुनिक विधावां मांय ‘उपन्यास’ सिरै विधा मानीजै। राजस्थानी साहित्य री बात करां तो इण विधा रा ऐनाण आजादी सूं पैली देख्या जाय सकै। इण विधा रा बडेरा शिवचंद्र भरतिया रो ‘कनक-सुंदर’ बरस 1903 नै राजस्थानी रो पैलो उपन्यास मानण पेटै एक राय कोनी। इण पछै श्रीनारायण अग्रवाल रो ‘चम्पा’ बरस 1925 में छप्यो। आं दोनूं उपन्यासां रा प्रवासी राजस्थानी लेखकां पछै राजस्थान मांय उपन्यास लेखन रो जस बीकानेर रा लूंठा साहित्यकार श्री श्रीलाल नथमलजी जोशी नै जावै। आपरो उपन्यास ‘आभै पटकी’ बरस 1956 मांय साम्हीं आयो। असल मांय आ उपन्या-जातरा री विधिवत सरुआत ही।
केई विद्वानां रो ओ पण मानणो है कै आपां नै उपन्यास विधा री बात आपां री जूनी लांबी लोककथावां सूं जोड़ करणी चाइजै। मनोहर शर्मा रै कुंवरसी सांखलै नै उपन्यास नै इणी दीठ सूं देख्यो जावै। मरुवाणी पत्रिका रा संपादक कवि- आलोचक श्री रावत सारस्वत मुजब राजस्थानी मांय आधुनिक उपन्यास री असल सरुआत बीकानेर रा चावा-ठावा कथाकार यादवेंद्र शर्मा ‘चंद्र’ करी। आपां जाणा कै कथाकार श्री अन्नाराम ‘सुदामा’ उपन्यास-विधा रै लेखै सदीव चेतै रैवणियो नांव बीकानेर रै खातै। सुदामा जी री रचनावां मांय लोक संवेदना अर ग्रामीण जन जीवण रा लूंठा चितराम देख्या जा सकै। उपन्यास विधा री थरपण अर विगसाव मांय रै लेखै घणो घणो जस बीकानेर री धरती नै जावै।
उपन्यास विधा रै सिरजण अर विगसाव मांय बीकानेर सदा सूं आगीवाण रैयो है। श्री भूरसिंह राठौड़ रो ऐतिहासिक उपन्यास ‘राती धाटी’ अर श्री भंवरलाल ‘भ्रमर’ रै बाल उपन्यास ‘भोर रा पगलिया’ नै मेहताऊ मान्या जावै। बीकानेर रो जस कै उपन्यास विधा मांय अठै रा साहित्यकार सर्वश्री रामनिवास शर्मा, अब्दुल वहीद ‘कमल’, देवकिशन राजपुरोहित अर देवदास राकांवत आद घणा सक्रिय रैया। श्री बी. एल. माली री उपन्यास-सिरजण बीकानेर मांय रैवतां थका करियो। इणी पूरी ओळ मांय एक नांव कथाकार श्री मधु आचार्य ‘आशावादी’ रो उपन्यास ‘गवाड़’ रै मारफत जुड़ियो। घणै गीरबै सूं कैयो जावणो चाइजै कै उपन्यास विधा मांय बाराना सिरजण रो जस बीकानेर रै साहित्यकारां अर इण धरा नै।
उपन्यास विधा मांय समूळ बदळाव लावणिया श्री मधु आचार्य आपरै उपन्यास गवाड़ सूं उत्तर आधुनिकता रो सांवठो दीठाव रचियो। गवाड़ उपन्यास नै इक्कीसवी सदी रै टाळवै भारतीय उपन्यासां री जोड़ मांय राख सकां। आ बात इण मंच माथै साम्हीं देख’र कैयोड़ी बात नीं मानी जावै। असल मांय गवाड़ रै जोड़ रो राजस्थानी मांय दूजो उपन्यास है ई कोनी। राजस्थानी भाषा मांय आज तांई लगैटगै सौ रै करीब उपन्यास प्रकाशित हुयोड़ा पण अजेस कीं सांवठो काम करण री दरकार लखावै।
‘गवाड़’ जिसै उपन्यास पछै श्री मधु आचार्य ‘आशावादी’ रै नुंवै उपन्यास ‘अवधूत’ सूं आपां री उम्मीदां कीं बेसी हुवणी लाजमी लखावै क्यूं कै वै ‘गवाड़’ रै मारफ इण विधा मांय प्रयोग करता थका इण विधा री एकरसता नै बदळण रो काम करियो। ‘गवाड़’ उपन्यास आपारी भाषा, बुणगट अर कथ्य रै हिसाब सूं आपरी लारली पूरी धारा सूं साव अलायदो इण रूप मनीजै कै इण मांय उपन्यास विधा रा सगळा मूळ मंतर बदळियोड़ा है। आप जाणो कै गवाड़ नै राजस्थानी भाषा साहित्य एवं संस्कृति अकादमी सूं मुरलीधर व्यास राजस्थानी कथा पुरस्कार ई मिल्यो।
‘अवधूत’ उपन्यास माथै बात करण सूं पैली अठै ओ उल्लेख जरूरी है कै श्री मधु आचार्य ‘आशावादी’ राजस्थानी अर हिंदी दोनूं भाषावां मांय लगोलग लिख रैया है। उपन्यास, कहाणी, कविता अर निंबध आद विधावां मांय आपरी केई पोथ्यां प्रकाशित हुयी। देस रा नामी साहित्यकारां आलोचकां वां रै रचना-कर्म री सरावना करी। लारलै बरसां रो लेखो-जोखो लगवां तो जित्ती मात्रा अर जित्ती सक्रियता सूं साहित्य रै सीगै मधु भाई साहब रो काम साम्हीं आयो है, बो देख्यां अचरज अर हरख हुवै। मंगळकामना कै आपरी कलम सदा हरी नै सवायी रैवै।
म्हारो मानणो है कै कोई पण रचनाकार आपरै चौफेर सूं किणी रचना रा बीज टाळै अर सिरजण-जातरा मांय बगत आयां बै बीज पांगरै। उपन्यास ‘अवधूत’ रो बीज-सबद इण रै सिरैनांव सूं उजागर हुवै। सवाल है कै अवधूत कुण अर कियां हुवै? कोई अवधूत क्यूं हुवै? अवधूत रो मायनो कांई? इण सूं जुड़्योड़ा सगळा सवाल अर बातां राजस्थानी रै सीगै नुंवी लखावै। जूण सूं जुड़्योड़ा केई-केई सवाल घणा अबखा अर ‘अवधूत’ खुदो-खुद मांय अेक अबखो सवाल।
अवधूत पेटै सामाजिक अवधारणावां न्यारी-न्यारी देखण-सुणण नै मिलै। दुनिया रै सार-असार री बातां विचारतां केई बातां सांम्ही आवै। कोई मिनखजूण नै जुध ज्यूं परोटै, तो कोई जियां-तियां आपरो गाड़ो गुड़कावै। कोई इण जूण सूं अळधो भागण मांय सार जाणै, तो कोई अटकळ रै आंटै अटक्यो काम साधै। दुनिया सबद रै मायनै मांय आखी दुनिया आवै। हरेक मानवी री आपरी न्यारी दुनिया हुवै, पण न्यारी-न्यारी दुनिया जद रळै तद अेक दुनिया बणै। आज आपां सांम्ही संकट ओ है कै न्यारी-न्यारी दुनिया आपसरी मांय रळै क्यूं नीं, अर रळै तो उण रो बो अेकठ सरूप क्यूं नीं दीसै? उपन्यासकार श्री मधु आचार्य ‘आशावादी’ आपरै नुंवै उपन्यास ‘अवधूत’ रै मारफत जाणै अेक सुपनो रचै कै आखी दुनिया आपसरी मांय रळ परी किणी इकाई रूप अेक हुवणी चाइजै। जद आपां आधुनिकता, उत्तर-आधुनिकता अर ग्लोबल-क्रांति रै जुग मांय पूगग्या हां, तद इण ढाळै रो सवाल जरूरी लखावै।
उपन्यास अवधूत री सरलता, सहजता अर पठनीयता रो मूळ कारण भाषा अर संवाद मान सका। छोटी-छोटी ओळ्यां मांय उपन्यासकार जाणै जीवण नै आपां साम्हीं खोल’र राख देवै। असल मांय गवाड़ रै मोटै फलक पछै जाणै उपन्यासकार साव नजीक सूं इण गवाड़ मांय सूं किणी अवधूत री कथा आपां साम्हीं रचै। ओ रचणो फगत उण बीमारी नै प्रगट करणो कोनी कै आज इण दौड़ती दुनिया मांय विकास री मोटी-मोटी अर लंबी-चौड़ी बातां पछै ई समाज रो असली चैरो ओ है। उपन्यासकार श्री मधु आचार्य ‘आशावादी’ आपरी कथा मांय सूं आं सगळी बातां मांय सूं ई मारग निकाळै। लूंठा लिखारा प्रेमचंद आपरी पोथी कुछ विचार मांय जिण मशाल री बात साहित्यकारां रै हाथ देवण री बात करै बा बात असल मांय उजास री है। अवधूत असल मांय अंधारै सूं उजाळै री कथा है। किणी मेळ मिलाप अर जोड़ खातर उजास री दरकार हुया करै। आज चौफेर उजास नै भखणियो अंधारो डाकी हुयोड़ो दीसै इण बगत मांय आ उजास देवती कथा घणी रूपाळी लखावै। उपन्यास री मूळ भावना एक ओळी मांय कैयी जावै तो कैय सकां कै अंतस उजास खातर दीवो चसावण री जरूरत कोनी। सार री बात आ है कै आपसी प्रेम, सहयोग अर सद्भाकव अगाड़ी सगळा जंतर-मंतर फेल हुय जावै।
कोई पण रचनाकार आपरी रचना मांय समाज नै जोड़ण रो काम करै अर आ सावचेती ई रचना री सारथकता सिध करै। कैयो जावणो चाइजै कै ‘अवधूत’ उपन्यास आपारै सामाजिक साम्हीं जूण रै मूळ मंतर नै घणै नेठाव सूं रचै। मंतर ओ कै दुनिया मांय सगळा सुख-दुख आपां मांय मिलै। खुद री दुनिया नै आखी दुनिया मांय रळ्यां-रळायां मिलै। मिनख-मिनख मांय किणी ढाळै रो कोई भेद कोनी। हरेक भेद नै भांगण रो मारग हुया करै। इण मारग माथै किणी रचना नै लेय’र जावणो असल मांय मिनख नै मिनख सूं जोड़ण रो जतन कैयो जावणो चाइजै। ‘अवधूत’ उपन्यास केई भेद भांगतो मिनख नै मिनख सूं जोड़ण-जुड़ण री बात करै।
ओ सवाल करियो जाय सकै कै गवाड़ पछै अवधूत बांचण रो सुख किसो’क? आप गवाड़ बांच्यो है अर अवधूत बांचोला। अपानै लागैला कै जीमण मांय घापण अर रंजण री बात पछै ई लालसा हुया करै। अवधूत मांय धापण अर रंजण रो सुख है, पण ललसा ई भेळै जागै कै आगै कद किसो उपन्यास आसी। किणी रचना नै बांच्या पछै रचनाकार सूं आगली रचना री उम्मीद करणी बेजा बात कोनी। आ किणी रै लेखन री सफलता मानीजै। आपां री आ उम्मीद मधु जी पूरी करैला।
सेवट मांय कैवणो चावूं कै विषयगत नवीनता लियोड़ै इण उपन्यास ‘अवधूत’ मांय जीवंत अर सहज नाटकीयता भेळै आपां रै आसै-पासै री आपां री दुनिया मिलै। मन नै परस करती इण कथा मांय सहज, सरल अर प्रांजल भाषा साथै गजब री पठनीयता रो गुण देख्यो जाय सकै। कथाकार श्री मधु आचार्य ‘आशावादी’ री कलम नै रंग। मंगळकामनावां अर बधाई कै बै लगोलग जसजोग सिरजण रै मारग आगै बधता जावै।
~ डॉ. नीरज दइया
(आभार- दैनिक युगपक्ष)
